Na aña 2024, ‘Stichting Primary Care Curaçao’ a habri un sentro di prevenshon (Sentro pa Salú Públiko) di gobièrnu. Sentro pa Salú Públiko ta e promé sentro di prevenshon na Kòrsou ku ta dirigí spesífikamente na mehorá salú públiko pa medio di prevenshon i maneho efisiente di malesa króniko. E meta ta pa logra esaki ku prevenshon, intervenshon trempan, edukashon i monitoreo regular di salú. E sentro di prevenshon ta sostené kuido di dòkter di kas na Kòrsou. Enfoke ta riba kuido preventivo di diabetes mellitus (diabetes tipo 2), malesa di kurason i kuido pa hende grandi. Tur e servisionan ta gratis.

​

Na 2024, Sentro pa Salú Públiko a kuminsá ofresé servisio di diabetes, ku ta yuda hende gratuitamente pa manehá diabetes tipo 2. Alabes ta duna servisio i kuido na personanan ku ta prediabetes, mientras asuntunan relashoná ku malesa di kurason i ardu tambe ta inkluí. Sentro pa Salú Públiko ta yuda hende kontrolá diabetes i mehorá nan kalidat di bida pa medio di edukashon, guia tokante alimentashon i ehersisio, i monitoreo regular di nivel di suku den sanger. E sentro ta mantené kontakto estrecho ku dòkter di kas di e pashènt via un sistema di informashon digital pa asina informá e dòkter di desaroyo di su pashènt.

​

Te ku luna pasá, e sentro di prevenshon tabata operá for di dos lokalidat: Otrobanda (Pater Euwensweg 46, ku tambe ta sede di Huisartsenpost) i Bandabou (Weg na Willibrordus z/n). Awor a habri un terser lokalidat na Bandariba (Kaya Otaheito 35 na Montaña). Sentro pa Salú Públiko ta hopi kontentu ku e ekspanshon aki.

​

E sede na Montaña ta stratégikamente situá pa sirbi komunidat di Bandariba, hasiendo kuido preventivo mas asesibel pa poblashon i mehorando salú públiko na Kòrsou. E fasilidat nobo ta habrí for di 8:00 AM te 5:00 PM tur dia di siman i ta ekipá pa un tim di profeshonal dediká ku ta duna servisio di kuido di kalidat haltu. Sentro pa Salú Públiko na Montaña ta situá den mesun edifisio ku Botika Montaña Nobo.

​

E ekspanshon aki ta fortalesé e kompromiso di Sentro pa Salú Públiko pa mehorá kuido di salú públiko i garantisá asesibilidat na kuido preventivo di kalidat haltu pa komunidat. Ademas, e ta un parti esensial di maneho di Minister Javier Silvania di Salú, Medio Ambiente i Naturalesa.

​

Por registrá gratis via telefòn 9304 òf via wèpsait: www.salupubliko.com

Tur habitante ta keda invitá pa bishitá e sede nobo na Montaña òf un di e otro sedenan pa haña sa mas tokante e servisionan i partisipá den e programa di salú. Tur esaki ta gratis pa tur hende.