Sentro pa Salú Públiko ta e sentro di prevenshon di gobièrnu ku ta enfoká riba mehorashon di salú públiko pa medio di prevenshon i maneho efektivo di malesa króniko. Na 2024 a inisiá ku un servisio spesial pa diabétes, ku ta duna servisio gratis pa yuda manehá diabétes tipo 2. E servisio aki ta disponibel pa tur hende ku ta den un estado prediabétiko i ta ofresé alabes kòntròl riba malesa di kurason.

​

Awor Sentro pa Salú Públiko tin un di dos servisio importante: Kuido Preventivo pa Adulto Mayor. Mirando ku edat di poblashon di Kòrsou ta subiendo i tin nesesidat spesífiko pa kuido di adulto mayor, Sentro pa Salú Públiko ke duna mas apoyo na e grupo aki.

E kuido preventivo pa adulto mayor ta enfoká riba mehorashon di salú físiko, mental i sosial di hende mayor di 70 aña ku no ta biba den un instansia di kuido. E meta ta pa duna nan un bida mas largu, independiente i salú, mientras ta redusí riesgo di malesanan komun di hende grandi, manera deterioro di memoria, aksidente ku kaimentu i inbalides.

​

Pa haña un idea kompleto di e estado di salú di adulto mayor, Sentro pa Salú Públiko ta hasi diferente tipo di kòntròl preventivo. Entre e kòntròlnan aki, ta midi preshon di sanger, evaluá e riesgo di pèrde balansa ku por result den kaimentu i ta tèst pa malesa króniko manera diabétes. Pa evaluá salú mental, ta usa instrumento pa detektá si tin problema prematuro di memoria. Tambe ta mirá si e adulto mayor tin sufisiente apoyo sosial i si tin sintimentu di soledat. Si ta nesesario, ta referí nan na kuido spesífiko ku ta mas adaptá na nan nesesidat.

Sentro pa Salú Públiko ta duna alabes informashon na adulto mayor, famia i persona ku ta kuida nan, riba kuido preventivo pa hende grandi.

​

Sentro pa Salú Públiko tin tres sede: Otrobanda (Pater Euwensweg 46, mes kaminda ku Huisartsenpost), Bandabou (Weg na Willibrordus z/n) i Bandariba (Kaya Otaheito 35 na Montaña).

​

E sentro di prevenshon ta traha den kontakto direkto ku dókter di e pashènt. Ta manda tur resultado di kòntròl i tèst digitalmente pa su dókter i e ta tuma tur desishon den konsulta ku e dòkter.

​

Sentro pa Salú Públiko ta sigui traha pa mehorá kuido públiko i pa garantisá akseso mas fasil na kuido preventivo di kalidat, pa nos komunidat. Esaki ta un parti esensial di maneho di Minister Javier Silvania di Salú, Medio Ambiente i Naturalesa.

​

Por registrá adulto mayor for di 70 aña òf por haña mas informashon tokante Kuido Preventivo pa Adulto Mayor gratis via telefòn 9304 òf via wèpsait: www.salupubliko.com.